性心理學 -無事常做愛！性愛有益健康的10個好處

今天熱話


了解更多..




性心理學

無事常做愛！性愛有益健康的10個好處

成日話香港係個文明先進嘅大城市，但一講到性，大部分人都唔想多講，有啲人仲會起晒弶，如果係女仔主動開口談性嘅話，唔使審立即被扣上「蕩婦」之名。其實性慾人皆有之，而且行房可以係為咗繁衍下一代，亦可以維持兩小口子嘅親蜜關係，而且喺擺動身體嘅同時，你都消耗緊啱啱嗰杯極邪惡隱世拉絲綠茶雪糕架。當然你可以繼續把口唔講齋做扮保守，但我始終覺得坦白溝通更重要。一齊睇吓行房十大好處！

1. 卡路里拜拜 床上運動係一項全身運動，仲會用到一啲你平時好少用到嘅肌肉同筋腱。外國有研究指出，如果由前戲開始計到高潮大概30分鐘嘅話，男人平均每次性愛可以消耗到約100卡路里，而女仔平均亦有70卡路里，覺得消耗得太少？咁仲唔畀心機愛得耐啲！

2. 失眠夜拜拜 有冇發現高潮過後，就好似趕完大project咁，即刻可以倒頭大睡呢？無錯，因為高潮會令我哋嘅身體釋放一種令人放鬆嘅荷爾蒙prolactin，所以下次失眠嘅話，唔好再拎起部電話碌facebook喇。

3. 壓力拜拜 我哋成日都話要介紹個男人畀啲麻煩女上司識，除咗因為男人可以令個女上司不再沉迷工作之外，原來性事嘅滿足感，可以幫佢更有效面對壓力，而固定嘅性事，仲可以令佢成日春風滿面，做事都爽手啲，到時仲邊得閒摔你數啫。不過注意呀，呢個功效只限有對手嘅床上運動，自娛另計。

4. 心血管病拜拜 床上運動可以控制身體裡面嘅雌激素同睾丸素，連帶影響成個body，當然包括心臟啦。專家話，如果你同伴侶關係健康嘅話，每個星期大概會想曳曳兩次嘅，如果能夠持續每星期兩次直到永遠嘅話，仲有機會將患上心血管疾病嘅機會率減半架。

5. 增強學習能力 聽落好似奶粉廣告對白，但研究發現床上運動除咗可以訓練腰部肌肉之外，原來亦可以刺激腦部神經發展，增強記憶力同埋學習能力架。

6. 維繫兩人感情 成日聽到啲朋友話爸爸長期做廳長，阻住佢夜晚睇電視。結婚愈耐，床事愈少，係好多夫婦都經歷緊嘅事。唔好以為係好平常無乜所謂呀，正所謂，床頭打交床尾和吖嘛，你哋都唔喺床頭打交，仲點和好啫。 堅持每星期兩次，除咗可以減少心血管病，仲可以維繫兩個人嘅感情架。無論你同另一半係30歲定係80歲，就算有心無力，可以唔使埋牙，身體接觸或者互相撩動性慾嘅愛撫都收貨架。

7. 拜拜Cancer 好多人都聽過男仔J得多可以防前列腺癌，其實女仔都有福利！一個法國研究指出，女仔如果可以維持一個月最少一次床上活動嘅話，患上乳癌嘅風險會大大減低。

8. 增強免疫力 做運動可以提升免疫力，床上運動亦一樣。研究發現，每個禮拜1至2次床上運動，傷風感冒都會少啲架。不過最神奇嘅係，搞得愈多又唔代表免疫力愈高喎，（可能因為成日唔著衫會懾親啦）一個禮拜有3次或以上床事嘅人，免疫力又會比1至2次嘅少。

9. 皮膚都靚啲 點解啲人成日話拍拖令人春風滿面？就係因為親密關係會令身體釋放安多酚同埋快樂因子，加上頭先講過愛愛可以消滅失眠同壓力，仲可以控制荷爾蒙，咁皮膚自然靚啲，望落都後生啲啦！

10. M Come不再苦 女仔經期總係唔準時，或者痛到想死，大部分原因都係因為壓力太大，而翻雲覆雨除咗本身係一件樂事，仲可以減壓，仲可以減輕月事帶來嘅痛苦架。

其他內容, 延伸閱讀..

其他相關內容--

最新目録

有用連結



關於我們

專業服務

©2023 性心理學 -無事常做愛！性愛有益健康的10個好處 hdgate31.ohgraph.com@ OhGraph
我們的社交媒體: